१ असार, सुर्खेत-
गुर्भाकोट नगरपालिका–९ सहारेस्थित गुर्भाकोट बहुमुखी क्याम्पसको ८औँ चुनावी साधारणसभाबाट छविलाल डाँगी पुनः अध्यक्ष पदमा निर्वाचित हुनुभएको छ। यो उहाँको दोस्रो कार्यकाल हो। अध्यक्ष पदका लागि प्रारम्भमा तीन जनाको उम्मेदवारी परेको भए पनि अन्ततः सहमतिका आधारमा छवि डाँगीसहित ९ सदस्यीय कार्यसमिति सर्वसम्मत रूपमा चयन भएको क्याम्पसले जनाएको छ।
नवनिर्वाचित कार्यसमितिका सदस्यहरूमा बलबहादुर पुन मगर, हर्कबहादुर डाँगी, शशिराम भट्टराई, शेरबहादुर कामी, युवराज खत्री, दिनेश वली, दुर्गादेवी वली र अमृता विक निर्वाचित हुनुभएको छ। साधारणसभाले क्याम्पसको शैक्षिक गुणस्तर अभिवृद्धि, भौतिक पूर्वाधार विकास तथा समुदायसँगको सहकार्यलाई थप प्रभावकारी बनाउने प्रतिबद्धतासहित नयाँ नेतृत्व चयन गरेको बताइएको छ।
नवनिर्वाचित अध्यक्ष डाँगीले क्याम्पसको समग्र विकास, शैक्षिक वातावरण सुधार तथा विद्यार्थीको हितलाई केन्द्रमा राखेर काम गर्ने प्रतिबद्धता व्यक्त गर्नुभएको छ। स्थानीय शिक्षा क्षेत्रमा महत्वपूर्ण भूमिका खेल्दै आएको गुर्भाकोट बहुमुखी क्याम्पसको नेतृत्वमा अनुभवी टोली चयन भएपछि क्याम्पसको थप प्रगतिमा टेवा पुग्ने अपेक्षा गरिएको छ।
